現時疫情肆虐，個個變成宅男宅女，唔係上網就是開著部電視。而見得最多嘅唔係恆馳汽車就係Brian車。兩者宣傳手法都係同出一轍 － 疲勞轟炸至無處不在。而Brian車嘅24小時自動吸客系統，同負責新能源汽車嘅恆大健康股價都一樣：”too good to be true”。
最近同朋友打牙胶，話如果恆馳汽車搵Brian車做廣告代言人，簡直係天作之合。兩者可以慳番一半Budget嚟同一時間，同一個廣告狂loop大家，而大家眾又可以睇少一半廣告。連設計對白都幫佢諗埋「我如何8個月內由負債四百萬，到依家眼都唔眨買起一套恆馳1 – 6名車！嗱，我Brian車唔係曬自己有錢買6部車，而係曬屋企有位泊足6部車！」
筆者無意嘲笑或貶低魅力營銷大師車Sir。其實我算很早期已subscribe佢個Facebook page，雖然內容由始至終變化不大，但佢個故仔都冇乜前後矛盾，day 1已經咁誇。反而我覺得佢delivery做得唔錯，以一個三幅被嘅內容嚟講，啲片其實拍得幾好睇。大眾嘅反感，其實多多少少出自疲勞轟炸。但咁又點，人地多budget。
至於網民唱佢呃人，買咗佢8萬蚊嘅堂，呢個其實都係願者上釣。佢又唔係健身中心玩密室困獸鬥，簽完咭先俾走。而佢亦證明到自己係個好sales，如果佢sell唔到堂亦唔會有budget去疲勞轟炸你。一個成功嘅sales就係將平平無奇，而你又唔係真係好需要嘅嘢，氹到你打開銀包，自動獻身！
反而稅局會更加關心車Sir係咪車大炮，由負債四百萬至每個月七位數字收入固然好勵志，但計計數，該收入喺香港打工皇帝已經係排第三位，剛剛在李澤鉅之後，實在係政府嘅金蛋。
即係咁，萬一你真係咁不幸用咗8萬蚊買左堂，而又覺得俾人搵老襯嘅話，首先恭喜你！因為你將來對傳銷嘅免疫力將會大大提高，唔駛打疫苗。8萬蚊不如當身外物，仲有大把世界追得番。而你仲有嘅係時間，橫惦依家全民上網時間大增，何不學番兩招YouTube傳銷，將來做番另一個Brian車做一番「事業」呢？
相對Google同Facebook，中小企投放在YouTube嘅廣告較少。通常一想到投放網上廣告，我們都會先想到search engine marketing (SEM)，但其實YouTube已經喺全球第二大搜索引擎。試想想，如果你想搵東京嘅旅遊資訊，除左Google之外你search YouTube睇片可能更加直接，而其實YouTube放廣告亦可能冇大家想像中咁貴。
YouTube投放廣告分為幾種，大家最常見就是Bumper Ad，看完頭6秒就可以skip。而YouTube的廣告係要觀看30秒以上才收費。所以啲YouTuber成日叫大家支持要有耐性睇廣告，咁佢地先有得分賬。一般每個睇足30秒嘅「view」大概只需廣告費港幣$0.4-0.5元，其實唔係真係咁天價。而由於大部份viewer都睇唔夠30秒就skip，所以你廣告嘅impression會比要付款的「view」多很多。
因為大部份的人都只會觀看6秒就skip廣告，所以精準部署這黃金6秒至為關鍵。以下少少貼士大家可以參考：
一種方法係將你最重要嘅訊息喺6秒中帶出嚟，令觀眾留下印象。首先，品牌必需顯眼地，愈早愈突出在六秒內出現，否則觀眾未知你賣乜廣告已經skip咗。另外要注意的是現時很多短片都是經手機收看，制作時應在視覺上有所調整，例如用近鏡拍攝，使用大字，用色強烈等，這可使短片更易吸收，提高宣傳效益。
最重要的是，你的內容必需極奇精簡，只帶出一個重點訊息，節奏明快，單刀直入。可以係產品其中一個與別不同的feature，可以係限時大減價。觀眾只可以吸收一個message。更高招係搞些噱頭，不按章出牌，讓觀眾留下深刻印象。以下是筆者認為一個經典的例子，SK-II 神仙水廣告大家見得多，這個YouTube廣告找來英國喜劇演員James Corden教湯唯擺甫士，一開頭就用蝦碌的一面吸引觀眾眼球。
另一種比較進取嘅手法係營造一個故事，希望你睇曬成個廣告。YouTube廣告全長可以幾分鐘，如果觀眾睇晒當然宣傳效益比電視廣告更入腦。香港最常見嘅都係用炫耀一招。睇番Brian車啲金句：(1) 買手機好過買保險：「如果，我突然之間一無所有，無曬任何收入，剩低一部手機⋯⋯以前嘅我，一定非常之擔心同一定好驚⋯⋯但今日，我已經唔怕，只為依家，我只需要一部手機，我就有能力用最短嘅時間，去搵番我失去曬嘅所有嘢！」(2) 8秒鐘賣個錢喺樹生出嚟嘅fantasy：「你試幻想一下，每分鐘嘅收入，62萬5千蚊美金，一個鐘頭3千7百萬美金，一日呢，9億美金收入」。相信聯儲局日日QE會好有共鳴。
玩故事廣告玩得最出神入化一定係毛記。搵黎明唱口水歌賣白咖啡。呢個你可以話係明星效應，但搵YouTuber Ming仔拍個「猛鬼辦公室」廣告就真係一絕，質素分分鐘好過你原本要睇段YouTube片。
玩故仔搏觀眾唔skip嘅竅門就係盡量緊扣觀眾日常遇到的場境，產生共鳴，或者牽動觀眾的情緒。故事本身要節奏明快，加強張力，因一有悶場觀眾即skip，你就帶出唔曬個內容。
而題材來說獨特性和噱頭必需花足心思，而搞笑永遠係低成本高效益嘅formula。對誇國品牌嚟講，個內容一定要夠地道特色，切合本地文化。鏡頭中可以考慮多用slow motion，這樣可能腦筋更加集中，有時間消化廣告個message。
喜歡這個小錦囊嘛？記住Like我們的Facebook專頁，觀看更多創業資訊和經驗分享！
WOOM是一個共享工作間的預訂平台，亦是數碼港培育計劃的駐場企業。透過WOOM的手機App，你可以即時預訂全港超過三十個地點的會議室(Meeting room)，流動工作枱(hot desk)和其他商務空間。毋需簽約，按使用收費，為你初創企業提供更大彈性，節省更多！
